ភ្នំពេញ៖ នាសម័យប្រជុំពេញអង្គគណៈរដ្ឋមន្ត្រីនៅថ្ងៃទី០៧ ខែមេសា ឆ្នាំ២០២៣ នាយករដ្ឋមន្ត្រីកម្ពុជា សម្តេចតេជោ ហ៊ុន សែន ចង់បង្កើតឱ្យមានគម្រោងហេដ្ឋារចនាសម្ព័ន្ធតភ្ជាប់រវាងប្រទេសកម្ពុជា និងប្រទេសឡាវ។
សម្តេចតេជោ បានប្រគល់ភារកិច្ចនេះឱ្យក្រសួងសាធារណការ និងដឹកជញ្ជូន អាជ្ញាធរជាតិទទួលបន្ទុកកិច្ចការព្រំដែន រដ្ឋបាលខេត្តព្រះវិហារ និងរដ្ឋបាលខេត្តរតនគិរី ត្រូវសហការសិក្សាលើគម្រោងកសាងហេដ្ឋារចនាសម្ព័ន្ធតភ្ជាប់រវាងព្រះរាជាណាចក្រកម្ពុជា និងសាធារណរដ្ឋប្រជាធិបតេយ្យ ប្រជាមានិតឡាវ នៅតំបន់ទន្លេរពៅ ខេត្តព្រះវិហារ និងនៅតំបន់កន្ទុយនាគ ខេត្តរតនគិរី។
សម្តេចបានជំរុញឱ្យមានការសិក្សាគម្រោងហេដ្ឋារចនាសម្ព័ន្ធរវាងប្រទេសទាំងពីរ បន្ទាប់ពីប្រទេសទាំងពីរបានពិភាក្សាគ្នាពាក់ព័ន្ធនឹងការតភ្ជាប់ផ្លូវដែកល្បឿនលឿនរវាងប្រទេសទាំងពីរ និងជាមួយបណ្តាប្រទេសដទៃទៀត។
សម្តេចនាយករដ្ឋមន្ត្រីបានថ្លែងអំឡុងទៅទស្សនកិច្ចនៅប្រទេសឡាវកាលពីថ្ងៃទី១៣ ខែកុម្ភៈ ឆ្នាំ២០២៣ ដូច្នេះថា៖«ការពិភាក្សារបស់យើងក៏ក្របដណ្តប់ទៅលើបញ្ហាទាក់ទងនឹងវិស័យទេសចរណ៍ដែលមានការតភ្ជាប់វិស័យទេសចរណ៍តាមផ្លូវគោក និងផ្លូវអាកាសដែលអាចតភ្ជាប់បណ្តាទីក្រុងជាពិសេសទីក្រុងសៀមរាប ភ្នំពេញដែលអាចផ្តល់ឱកាសសម្រាប់ទេសចរអាចដំណើរគោលដៅមកកាន់ឡាវផង និងកម្ពុជាផង»។
សម្តេចបន្តអះអាងថា ប្រទេសទាំងពីរនឹងខិតខំនូវកិច្ចការទាំងឡាយ ទាក់ទងនឹងបញ្ហាព្រំដែនឱ្យទៅជាព្រំដែនមានសន្តិភាព និងពង្រឹងកិច្ចសហប្រតិបត្តិការលើគ្រប់វិស័យរវាងប្រទេសទាំងពីរឱ្យកាន់តែរីកចម្រើនបន្ថែមទៀត៕
